Ljósmóðir.is notar vafrakökur til að bæta notendaupplifun og stuðla að frekari þróun heimasíðunnar.
Upplýsingar um vafrakökur
Sæl, ég hef mikinn áhuga á ljósmæðrastarfinu og var að pæla hvernig námið gengi fyrir sér og hef ég nokkrar spurningar:) Ég hef lokið við stúdentinn í félagsfræði og hugvísindum og var að pæla, þarf ég að klára sjúkraliðanám, síðan hjúkrunarfræði og svo ljósmæðrafræði? Eða get ég farið beint í hjúkrunarfræði í háskóla? Eða hvernig virkar þetta? Er ljósmæðrafræði bara kennd í HÍ eða er hún kennd í fleiri skólum? Takk fyrir og fyrir framm þakkir:)
Góðan dag og takk fyrir fyrirspurnina,
Gaman að heyra af áhuga þínum á ljósmóðurfræði. Til að geta sótt um nám í ljósmóðurfræði þarf umsækjandi að hafa lokið við BS nám í hjúkrunarfræði og að hafa lokið tveimur námskeiðum í hjúkrunarfræði sem flokkast undir valnámskeið á fjórða ári. Ekki er þörf á að klára sjúkraliðanám.
Hér getur þú lesir þig nánar til um inntökuskilyrði.
Bestu kveðjur, Ilmur Björg Einarsdóttir, ljósmóðir.
Sæl, nú er barnið mitt enn óskorðað og ég er að velta fyrir mér hvort ég megi fara í sund eða ekki þar sem að ég er hrædd um að vatnið fari án þess að ég taki eftir því. Mynduð þið mæla gegn því að fara í sund svo seint á meðgöngunni með óskorðað barn?
Það er í góðu lagi að fara í sund þrátt fyrir að kollur barns sé óskorður. Gangi þér vel.
Hvað er utanlegsfóstur?
Takk fyrir fyrirspurnina,
Utanlegsþungun er þungun sem er ekki í leginu. Þegar frjóvgun verður eftir samfarir, þá frjóvgast egg í öðrum eggjaleiðaranum og þarf að flytjast um 2-3 dögum síðar í legið til að geta vaxið og dafnað þar.
Þessi ferð frá eggjaleiðara að legi gengur ekki alltaf upp. Algengast er utanlegsþungun í öðrum eggjaleiðaranum en getur verið annars staðar í nánd við legið.
Eggjaleiðarinn getur ekki stækkað eins og legið gerir á meðgöngu og því er hætta á að eggleiðarinn rofni ef þegar fóstrið stækkar. Það getur valdið innvortis blæðingu og verið lífshættulegt. Því þarf ávallt að rjúfa utanlegsþungun.
Algengasta einkenni utanlegsþungunar er mikill verkur öðrum megin í kviðnum. Í sumum tilfellum fylgja blæðingar með. Stundum er utanlegsþungun einkennalaus.
Utanlegsþungun er greind með sónartæki og mælingu á þungunarhormóni s-HcG í blóði.
Kær kveðja, Elfa Lind Einarsdóttir, ljósmóðir.
Góðan dag, Drengurinn minn er er sex og hálfa mánaða og kominn rúmur mánuður síðan hann byrjaði að borða mat. Hann er mjög hrifinn af graut og við höfum verið að prófa að gefa honum hitt og þetta meðfram. Hann er ekki hrifinn af banana en appelsínur falla mjög vel í kramið sem við setjum í sílikondúsu fyrir hann til að sjúga og kjamsa á. Við höfum gefið honum appelsínu með þessum hætti kannski þrisvar síðustu daga, aldrei oftar en einu sinni yfir daginn. En núna er ég komin með bakþanka því ég finn ekkert haldbært varðandi það að gefa svona ungum börnum sítrusávexti. Er það í lagi eða er betra að bíða með það? Með þökkum.
Það er í góðu lagi að gefa börnum, eldri en 6 mánaða sítrusávexti líkt og appelsínu. Í dag er ráðlagt að auka fjölbreytni í mataræði nokkuð hratt þegar ungabörn eru byrjuð að smakka mat. Appelsína er rík af C-vítamíni sem hjálpar líkamanum í upptöku af járni. Í sumum ráðleggingum er rætt að prófa fyrst banana, soðna peru eða soðið epli.
Hér er góður bæklingur frá Landlækni og Heilsugæslu Höfuðborgasvæðisins um næringu ungbarna. Að undanskyldu hunangi sem er ráðlagt að bíða með til 1 árs. Einnig góðar upplýsingar á vef heilsuveru.
Gangi ykkur vel. Kær kveðja, Elfa Lind Einarsdóttir, ljósmóðir.
Eru kryddjurtir öruggar á meðgöngu eins og til dæmis timian, steinselja, rósmarín og basil?
Almennt er öruggt að neyta allra helstu kryddjurta á meðgögngu svo lengi sem það er í hæfilegu magni líkt og notað er í mateiðslu. Ef af einhverjum ástæðum einstaklingur er að íhuga að taka inn ákveðna kryddjurt í miklu magni er ráðlagt að ráfæra sig við ljósmóður/lækni áður.
Ég er komin rúmar 28 vikur og hef verið að finna fyrir kláða og sviða í leggöngunum má ég nota Pevaryl stíla við þessu ?
Sveppasýkingar, meðal annars á kynfærum, eru því miður algengar á meðgöngu. Pevaryl stíla og krem má nota á meðgöngunni, en einnig er oft er mælt með að prófa Canesten fyrst þar sem það hefur reynst betur við meðhöndlun sveppasýkingar á meðgöngu. Virki hvorki Canesten né Pevaryl á einkennin ráðlegg ég þér að heyra í ljósmóður/lækni innan heilsugæslunnar fyrir frekari úrræði. Gangi þér vel.