Allt um meðgönguna

Ég er komin 9 vikur og hef farið í einn tíma hjá ljósmóður hjá heilsugæslunni. Ég fór að velta fyrir mér hvort að það er möguleiki að skipta um ljósmóður? Eða er kannski bara ein að vinna á hverri heilsugæslustöð? Vildi ekki spurja á Heilsugæslunni því ég ímynda mér að fólk þar vinni náið saman/þekkist vel.

Sæl,

Það er auðvitað hægt að skipta um ljósmóður. Það er mismunandi hversu margar ljósmæður vinna á hverri heilsugæslustöð á höfuðborgarsvæðinu en yfirleitt eru þær fleiri en ein.

Ritarar stöðvarinnar ættu að geta aðstoðað þig við að fá tíma hjá annarri ljósmóður eða ráðleggja þér að leita á næstu heilsugæslustöð. Það er mjög mikilvægt að fara til aðila sem manni líður vel hjá og mismunandi hentar hverjum og einum. Gangi þér vel.

Ég er með 10 mánaða barn á brjósti sem býst við að verði það áfram í 1-2 ár í viðbót.

Læknir var að mæla með að ég færi í stoðkerfisaðgerð en eftir hana þarf ég að taka parkodin í viku sem skv. lyfseðli má ekki taka með barn á brjósti. Er eitthvað annað sambærilegt verkjalyf sem má taka með brjóstagjöf? Eða þarf ég bara að fresta aðgerð þar til barnið er hætt á brjósti? Að pumpa á undan og gefa barni á meðan og svo pumpa á meðan er á verkjalyfjum til að viðhalda framleiðslu væri ekki góð lausn því barnið sýgur brjóstið til að róa sig og svæfa svo sogið sjálft á brjóstinu er ekki síður mikilvægt fyrir barnið en mjólkin sjálf.

Fyrirfram þakkir!

Góðan dag og takk fyrir fyrirspurnina,

Það er ekki ráðlagt að taka inn Parkodin á meðgöngu til lengri tíma. Það er spurning hvort Paracetamol myndi nægja (í lagi að taka með brjóstagjöf), en það fer eftir aðgerð og hvernig líðan er eftir aðgerð. Ég myndi ráðleggja þér að meta verkjastillingu með þeim lækni sem framkvæmir aðgerðina með tilliti til þess að verkjalyfin fari með bjróstagjöfinni. Gangi þér sem allra best.

Bestu kveðjur, Ilmur Björg, ljósmóðir.

Góðan daginn,

Ég er bara komin 9 vikur og 2 daga og hef átt hrikalega erfitt með svefn. Það er ég næ ekki góðum svefni. Næ að sofna en gæði svefnsins er ekki góður sem er farið að hafa áhrif á bara heilsu almennt. þetta er ekki vandamál sem ég hef átt við annars. Er bara að velta fyrir mér hvort eitthvað væri til sem væri öruggt að taka til þess að ná betri svefni eins og melatonin?

Kær kveðja

Góðan dag og takk fyrir fyrirspurnina,

Hér er upplýsingar um einfalda hluti sem geta bætt svefn og svefnrútínu. Ég hvet þig til að skoða listann og athuga hvort eitthvað á listanum getur ýtt undir betri svefngæði hjá þér. Ef engin ráð virka og svefninn er áfram slæmur væri sniðugt að hafa samband við ljósmóður í meðgönguvernd og meta aðstoð með lyfjameðferð. Gangi þér sem allra best.

Bestu kveðjur, Ilmur Björg, ljósmóðir.